Dr. Hedgewar Mobile Clinic Van, Shahuwadi

डोंगराळ, जंगलसदृश भाग, पक्के रस्ते नाहीत, पावसाळ्याचे चार महीने तर घराबाहेर पडणेही मुश्किल अशा ठिकाणी नाममात्र दरात फिरते रुग्णालय ही आरोग्य सेवा सुरु करण्याचा निर्णय विश्वस्त मंडळींनी घेतला. गरजू आणि आरोग्य सेवेपासून वंचित लोकांपर्यंत पोहोचणे हाच या पाठीमागचा उद्देश.
तोकडी शासकीय आरोग्य यंत्रणा, बोगस प्रॅक्टिशनर्सचा सुळसुळाट, चुकीच्या उपचार पद्धतींचा मारा आणि त्यावर रुग्णांचा मानसिक पगडा, वाहतुकीची सोय नाही अशा परिस्थितीत रुग्णांची हेळसांड होत होती. सुरुवातीला रुग्णांची मानसिकता बदलण्यासाठी डॉक्टरांना खुप मेहनत घ्यावी लागली. मुख्य व्यवसाय शेती व पशुपालन असल्यामुळे कष्टाची कामे भरपूर होती. त्यामुळे लोकांच्या आरोग्याच्या काही विशिष्ठ तक्रारी होत्या. झटपट आरामाच्या लोभापायी बोगस डॉक्टरांकडून चुकीच्या औषधांची सवय लावली गेली होती. हा प्रकार बंद करण्यासाठी लोकांना विश्वासात घेऊन त्यांचे प्रबोधन केले. लोकांच्या कामाच्या वेळेनुसार त्यांना सोयीस्कर अशा वेळी डॉक्टरांनी आपली सेवा दिली.